काय म्हणावं आता या बाईला?

ते कधीच कुणाला चांगलं
म्हणत नसतात
सगळे सिनेमे कविता
गाणी लेख माणसं
त्यांच्या मते फालतू असतात

हे कशाला करायचं
ते कशाला करायचं
ह्याचा काय फायदा
त्याचा काय फायदा
ह्यात काय विशेष
हेच पालुपद सतत
उगाळत बसतात

कंटाळून एकदा त्यांना बायकोने
एक कडक जाळ थप्पड लगावली
आरशात बघत साहेब म्हणाले
मूर्ख बेअक्कल गाढव कुठली
ही काय मारायची पध्धत झाली?

एक वळ सुध्धा नाही उमटला
काय म्हणावं आता या बाईला?  

-सत्यजित खारकर