कुरकुरीत कविता

घ्या मोजून शब्द माझे
तोलून मापून  बघा
वजन सुध्धा पहाच
आठ नेमके वेचले

झणझणीत स्वादिष्ट
कुरकुरीत तिखट
जणू  शेंगाच बांधल्या
या कागदाच्या पुडीत

तसे नेमके वेचून
शब्द सादर कविता
संपादक महाराज
स्वीकारावी मासिकात
-सत्यजित खारकर

माझी मराठी

मराठी मधुर भव्या
चतुर सतेज दिव्यां

सरस अती सुकाव्या
मनोरम सरस श्रव्या

सरस लय छंद वृत्त
सुप्रसन्न बहुत चित्त

सगुणा सतप्रेम रूपा
सरस्वती नीज कृपा

वीरांगना  चंडिका
थोर मराठी भाषा

-सत्यजित खारकर

 
   

जीवनदान

दिल विल प्यार
यमकं जोडून
फारच मजेनी
गाणी केली

कागदाची होडी
पावसाचं पाणी
सोडीली ती होडी
तरंगत

तो संगीतकार
मनात विचार
गाणी ही भिकार
आजकाल

आत्महत्या बरी
तळ्यात घे उडी
गाण्याची ती  होडी
सापडली

गाणी  सिनेमात
त्यानी मग  नेली
अशक्य गाजली
चोहीकडे

जीव आणखीन
आता  वाचवीन
जळात सोडून
नव्या होड्या

-सत्यजित खारकर 

चेंगट कवी

कुणा चेंगट कवीने
केली कविता चवीने
करता पोस्ट ऐटीने
धुलाई बहुत झाली

कुणी म्हणे बंद करा
कुणी म्हणे दया करा
दादा शोधा नवा धंदा
ऐसे त्यास हिणविले

प्रथम तो दचकला
मग मात्र उचकला
हजारो पोस्ट केल्या
कविता हो दिनामासी

वादा वादी फार झाली
कविता रोज ठोकली
स्वयं घोषित कवीने
भाळी मुक्या पामरांच्या

सरता श्रोते जिंकले
जणू देवाजी पावले
अकाउंट कि कवीचे

सस्पेन्ड पहा जाहले   

-सत्यजित खारकर

बापू झाडा वर कसा गेला?

चला फुगडी घालू गडे
गिर गिर गिर फिरूय्या गडे

सोबत फुगडी घालू राणी
गिर गिर गिरक्या गाऊ गाणी

गिर गिर गिर फुSS गडी
बाप्या बोंबिल बायकू तगडी

बापूला बुंगाट फिरीवला
झाडावर नेऊन बसिवला

बापू म्हणे:
ह्योच दिस महा पाहाचा असा
फांदीला कंदील लटकला दिसा
नुस्त दातं काढू नका लोकहो
झाडा वरून खाली उतरू कसा?

-सत्यजित खारकर

लव्ह्गुरु

मी  जातो  आहे झुरून   त्या काऊ च्या प्रेमात
लिहूनी मज एक द्या   कविता  कविराज
बैलोबा तुम्ही बघाच     कवी मी  जोरदार
हरखून प्रिया तव          बाशिंग बांधणार

हम्मा हम्मा गाणं आज   हिट तव देणार
इलू म्हणा मग तिला       इलू ती म्हणणार
अष्टभुज होण्या आधी     उत्तर एक द्यावे
आहे फीस माझी पक्की   घेईन मी क्याशने

पुढच्या पोळ्यास गडी      आला की भेटावया
सोबत आणल्या त्याने    पाच काऊ सुंदऱ्या  
लाजत लाजत जरा         नम्रपणे म्हणाला
हि कृपा सारी आपली      गटल्या या छोकऱ्या

आपले पाय धरू देत       मजला लव्ह्गुरु
एजंट समजा मज         आपुला महाप्रभू
आणले सोबत बघा        बैल दीड दोनशे
उपवर बैल बाके            खिशात खूप पैशे!


-सत्यजित खारकर