प्लीज

रंग पाहून उधळावेसे वाटत नाहीत
सूर ऐकून  गावेसे  वाटत नाहीत
गळ्यात पडून रडावेसे वाटत नाहीत
देवा मला असे मित्र
देवू नकोस

शब्दांशी ज्यांना खेळावे वाटत नाही
दर्यात ज्यांना डुंबावे वाटत नाही
पहाड कवेत घ्यावे वाटत नाहीत
देवा मला असे मित्र
देवू नकोस

ढोल ऐकून नाचावे वाटत नाही
पोटभर ज्यांना हसावे वाटत नाही
एकदाही चावट बोलावेसे वाटत नाही
देवा मला असे मित्र
देवू नकोस
 
प्लीज

-सत्यजित खारकर