हे माझ्याच बाबतीत का?

काय म्हणालीस?
हे  फक्त तुझ्याच बाबतीत का?
असं एकदा चक्क देवबाप्पा
स्वता:च तिला म्हणाला
तेव्हा तीच चकित झाली
म्हणाली बरं झालं
तुला चक्क वाचा फुटली
बाबारे माझी भक्ती
आज सफल झाली

तसा देव तिला म्हणाला
तुला काय वाटतं?
हे माझ्याच बाबतीत का?
हा काय प्रश्न फक्त तुलाच पडतो ?
जसा तुला पडतो तसा मला ही पडतो
तुला सुखी वाटणाऱ्या सगळ्यांना पडतो
शप्पथ सांगतो ब्रम्हदेवाला हि पडतो

आश्चर्य वाटून ती म्हणाली

रिअली? मग तुम्ही काय करता?
काही नाही एकदम सोप्पं
थोड्या वेळ वाईट वाटतं, वाटू द्यायचं
वाटलं तर पोटभर रडूनही घ्यायचं
मग छानसं काही तरी आठवायचं
बाहेर लोकां मध्ये मस्तं मिसळायचं  
झालं गेलं विसरून जायचं
नव्यानं आपलं गाणं गायचं    
-सत्यजित खारकर