काही दिवस असे असतात

काही दिवस असे असतात
काही दिवस तसे असतात
कधी सुखावून जातात
कधी दुखावून हसतात
काही दिवस असे असतात ....

इवल्या इवल्या चिमणीला घरकुल देते फांदी
झडली पानं हिमात सारी तरी गाणं गाई आनंदी
मजेत झोका घेते चिमणी भूर भूर उडवी चांदी
काही दिवस असे असतात....

सोन गोजिर्या डोंगरां आडून सूर्य नक्की उगवणार
रुसुनी बसल्या फुलवेलीचे चोरून चुंबन घेणार
दवबिंदूचे लख लख तारे लाख लाख चमचमणार
काही दिवस असे असतात...